விமான சாகச நிகழ்ச்சி.. உயிரிழந்தோர் எண்ணிக்கை 5ஆக உயர்வு…. தி.மு.க. அரசின் நிர்வாக சீர்கேடு உயிரிழப்புக்கு காரணம் – எடப்பாடி பழனிசாமி கண்டனம்!

சாலைகள், ரயில் நிலையங்கள் அனைத்தும் ஸ்தம்பித்தன. மெரினாவை ஒட்டியுள்ள சாலைகளில் நடந்து செல்லக்கூட முடியாத அளவுக்கு நிலைமை மோசமானது. ஒரே சமயத்தில் ஆயிரக்கணக்கானோர் முண்டியடித்த நிலையில், கூட்ட நெரிசலில் சிக்கி 30 பேர் மயக்கம் அடைந்தனர். இதில் வெயிலில் சிக்கிய கொருக்குப்பேட்டையைச் சேர்ந்த ஜான், 56, மருத்துவமனை கொண்டு செல்லப்பட்ட நிலையில் உயிரிழந்தார்.

தொடர்ந்து திருவொற்றியூரை சேர்ந்த கார்த்திகேயன், 34, என்பவரும் மருத்துவமனையில் சிகிச்சை பலனின்றி உயிரிழந்தார். தினேஷ் குமார், 37, சீனிவாசன் என்பவரும், மற்றொருவர் ராயப்பேட்டை மருத்துவமனையிலும்( இவரின் விபரம் தெரியவில்லை) உயிரிழந்த நிலையில், பலி எண்ணிக்கை 5 ஆக அதிகரித்துள்ளது. நெரிசலில் சிக்கிய 20க்கும் மேற்பட்டோர் தொடர்ந்து சிகிச்சையில் உள்ளனர்.

நிகழ்ச்சி முடிந்து 3 மணி நேரமான பிறகும் சென்னை சாலைகளில் கூட்ட நெரிசல் குறைந்தபாடில்லை. அந்த அளவுக்கு மக்கள் கூட்டம் திரண்டு விட்டது.சென்னையில் 21 ஆண்டுக்கு பிறகு வான் சாகச நிகழ்ச்சி நடந்தது; அதுவும் விடுமுறை நாள் என்பதால் ஏராளமானோர் திரண்டு வந்து விட்டனர். அரசு இதை முன் கூட்டியே எதிர்பார்த்து போதிய போக்குவரத்து வசதிகளை செய்திருக்க வேண்டும் என்பது பாதிக்கப்பட்டோரின் குமுறலாக உள்ளது.

இருப்பினும், இன்றைய நிகழ்ச்சியில் நிர்வாக ரீதியிலான ஏற்பாடுகளும், கூட்டத்தையும்- போக்குவரத்தையும் ஒழுங்கு படுத்துவதற்கு போலீசாரும் போதிய அளவில் இல்லாததால், மக்கள் கடும் கூட்ட நெரிசலில் சிக்கி, குடிநீர் கூட கிடைக்காத நிலை ஏற்பட்டு, மேலும் வெயிலின் தாக்கத்தால் பலர் மருத்துவமனையில் அனுமதிக்கப்பட்டுள்ளதாகவும், அதில் இதுவரை 5 பேர் உயிரிழந்துள்ளதாகவும் வரும் செய்திகள் அதிர்ச்சியும் , மிகுந்த வேதனையும் அளிக்கின்றன. உயிரிழந்தோர் குடும்பத்தாருக்கு எனது ஆழ்ந்த இரங்கலும் வருத்தங்களும்.

இதுபோன்ற முக்கியத்துவம் வாய்ந்த ஒரு நிகழ்வைக் கூட முறையாக ஒருங்கிணைக்கத் தவறிய நிர்வாகச் சீர்கேடால் உருவான விடியா தி.மு.க., அரசுக்கு எனது கடும் கண்டனங்கள். இந்தியாவின் பல்வேறு நகரங்களில் ராணுவ விமானப் படையின் தீரத்தை பறைசாற்றும் நிகழ்வுகள் இதுவரையில் சிறப்பாக நடைபெற்று வந்துள்ளன. ஆனால் இன்று தமிழகத்தில் நிகழ்பெற்ற நிகழ்வில் உயிர்சேதம் ஏற்பட்டிருப்பது மிகவும் வருத்தத்துக்குரியது. இந்நிகழ்வுக்கு முறையான பாதுகாப்பு கொடுக்க தவறிய இந்த ஸ்டாலின் அரசுக்கு என் கடும் கண்டனங்கள், எனக் குறிப்பிட்டுள்ளார்.